عيد الحب طيب هو فينه الحب

تعالوا هنا وقولولى فينه الحب هااااااااه

هو الحب فين .. .. يا جماعة أنا لسه شايفه هنا من سنتين
المرة دي بقى الموضوع سخن أوي .. بس مش عايزين مشاكل .. اللي يحبنا ما يضربش نار .. ههههههه
تعالوا نشوف الشباب الظراف اللطاف شوشو وتوتي في شوية المشاهد الكوميديكية دي ..

شوشو خطيب توتي .. لابس البادي الشديد ورايح يزورهم .. هو شهرته شوشو عضلات .. عشان عضلات صوابعه قوية جدا من كتر لعب البلاي ستيشن والأون لاين جيمز بتاعة ابن البلد .. شامبيون ما فيش كده .. من أول مايدخل البيت .. ونظراته الإعجاب تنهال عليه من حدب وصوب (يعني من كل حتة)
- الأب والأم في أصوات مختلطة .. أهلاااااان شوشو .. يا ختي كميلة .. والله دمه زي السكر .. ازيك يا شوشو .. من زمان ماشفناكش
- معلش والله يا أونكل .. (يبوس طنط بوسة كبيرة عشان عيب طبعا يبوس أونكل) .. من يوم ما نقلنا في الزمالك والمشوار بقى بعيد .. وانتي عارفة بقى النادي والمشاغل .. مابقاش فيه وقت خالص
- بس ايه الحلاوة دي ياشوشو .. أمور خالص والله
- ميرسي أوي يا تنت
تدخل توتي .. ومعاها الصينية وعليها البرتقان .. وعينيها ما بتنزلش من على عينيه .. شيك أوي التي شيرت ده يا شوشو .. مخليك جنان .. واد كول مش معقول (مع الاعتذار للزميل العزيز) ..
تقشر له البرتقانة وتأكله بإيديها .. خد دي من توتي
لا والله شبعان .. لسه واكل شيبسي ..
لا .. لا .. والله ما تكسف إيدي .. أمممممممممممه .. خد دي كمان
الله من إيدك زي العسل .. عسل يا توتي

الساعة الآن .. بعد سنتين

شوشو وتوتي كتبوا كتابهم .. شوية مشاكل طبعا على ترتيبات الفرح .. توتي داخلة ومعاها الصينية وعليها البرتقانة (منتهى الصمود .. صمود البرتقانة طبعا) .. بقاله سنتين بياكل فيها
توتي قشرت له البرتقانة .. وسابته وقامت مقموصة ..
توتي .. مالك
مانت كاسفني في وسط أهلى .. إيه يعني 100 ألف جنيه عشان نحجز في الشيراتون .. معقول مستخسرهم فيا كده
ياتوتي يا حبيبتي .. (بياكل البرتقانة) .. الموضوع مش كده .. انتي عارفة اني ما يفرقش معايا .. بس بابي مصمم نعمل الفرح في المدرعات .. أصل العيلة كلها اتجوزت فيها .. حتى هو عمل فرحه فيها أيام ما كانت عالطوب الاحمر .. دي حاجة عندنا زي ما تقولي كده .. وشها حلو علينا
معقول .. يعني أفهم من كده انك بتحبني
طبعا يا توتي وما قدرش اعيش من غيرك .. تعالي أقول لك كلمة سر ..
(بدلال) .. لاااااااااا .. بابا جاي .. اوعى كده

الساعة .. سنة أولى جواز ..

شوشوووووووو .. جبت لك البرتقانة
ايه يا توتي ما قشرتيهاش ليه
إيه يا شوشو .. مالسكينة في الطبق .. قشرها انت المرة دي بقى
يقشر شوشو .. وياكل

سنة تالتة جواااااااااااااز

يا تفيييييدااااااااااا .. انتي ياولية
فيه ايه .. عايز ايه يا شعباااااااااااان
فين يا ولية البرتقانة .. أنا خرمان أوي
سلامة الشوف يا شعبان .. انت اتعميت ياراجل .. مانت لسه شايفها في المطبخ وانت بتغسل المواعين
كده يا تفيدة .. مش هتقشريهالي
أقشرهالك .. لييييييه .. كنت الجارية اللي اشتراهالك ...............

كده نقدر نخش في الموضوع .. ياترى إيه حكاية الحب .. قبل الجواز .. وبعد الجواز
كتير من الأزواج .. والزوجات بالطبع بيشتكوا من فتور العاطفة .. وحالة الهيام والغرام والحب اللي كاااااان .. وان العيشة بينهم بعد الجواز بقت لا تطاق ..
ومن موقع إسلام أون لاين اقتبست هذا الحوار:

هي تقول: إنه دائمًا خارج المنزل، أكاد أُجن من صمته الأبدي، إنه لم يكن يمل الحديث معي قبل إتمام الزواج، أما الآن فأشعر أنه ينسى لسانه خارج المنزل، أصبح إنسانًا آخر، وجهه إما في الجريدة أو في التلفاز، أشعر بأني على هامش حياته إن كنت على خارطتها في الأساس.
وهو يرد ويقول: زوجتي تغيرت كثيرًا بعد الزواج، تريدنا أن نرجع إلى حالة المراهقة الأولى، تناست أن علينا أعباء لا بد من إنجازها لنلبي ضروريات الأسرة حتى تستمر، أصبح الحديث معها صعبًا؛ فهي تنتهز أي فرصة نتحدث فيها وتحيل الجلسة إلى جلسة نميمة عن أحوال الجيران، وإشاعة أسرارهم، أو الحديث عن صديقاتها وما يتمتعن به من عيش رغد أعجز أنا عن توفيره لها، وينتهي الحديث بمشاجرة ثم الصمت بعدها.
طبعا الصمت .. أو يسيبها في البيت ويخرج مع أصحابه .. أو يقعد على القهوة أو في السايبر .. ويروح وش الفجر .. تقريبا كل واحد منهم عايش حياة منفصلة عن الآخر.

إيه اللي حصل .. الحب راح فين .. هل تبخر .. هل هو موجود بس هم مش حاسين .. هل تتغير صورة الحب من قبل الجواز لما بعده .. الموضوع ده بيفكرني بواحد راجل هندي اشتغلت معاه فترة خارج مصر .. وكنا مرة قاعدين نهزر مع واحد صاحبنا لسه عريس جديد .. وانه بدل ما كان بيكلم أهله كل يوم والتاني في بلدهم .. بقى يكلم مراته ويطنش أهله .. فكنا نقول له .. خلاص ما بقتش تحب أهلك .. ومراتك خطفتك منهم .. الراجل العجوز ده قال كلمة حسيت انها حكمة .. قال ايه:

Love is there .. but action is different

الحب موجود .. لكن العاطفة تختلف .. تجاه الأهل عاطفة وتجاه الزوجة عاطفة من نوع آخر .. طيب لو افترضنا صحة الكلام ده .. هل نقدر نقول ان العاطفة قبل الجواز ليها شكل معين وطبيعة معينة .. وبعد الجواز ليها شكل تاني .. بيتهيألي لو جاوبنا على السؤال ده ممكن نحط ايدنا على جزء كبير من أسباب المشكلة .. عشان توتي تفضل تقشر البرتقانة طول عمرها للمحروس شعبان
بصراحة أنا جه في بالي بعض صور الحب اللي ممكن تكون بين الزوجين في مراحل زواجهم المختلفة .. وهي موجودة في التصويت .. والتصويت متعدد يعني ممكن تختار عدة اختيارات مع بعض .. ولكن الموضوع ده للنقاش .. والاختيارات دي خطرت على بالي .. وأكيد فيه غيرها .. وياريت نخرج من النقاش بأسباب حقيقية وحاجات عملية عشان نقضي على مشكلة ما يسمى بحالة الصمت الزواجي .. أو فتور العاطفة بعد الزواج .. عشان البرتقانة برضه .. تحياتي

لف فى اى منتدى براحتك .....فى غير اللغه الانجليزيه مش هتاخذ راحتك